Telugu chinthana

              బుద్ధుడు నవ్వాడు

బుద్ధుడు నవ్వాడు
అసహజ సంకీర్ణ సంగీత విభావరిలో
బ్రహ్మచారికి ముదిమిలోనూ తప్పని
ముదితలపోరు చూసి
        బుద్ధుడు పకపకా నవ్వాడు
మౌడ్యానికి మారణాయుధాన్నందించిన
భారత రత్నాన్ని చూసీ
లీకేజీయే లేని ప్రోఖ్రాన్ పరీక్షలను చూసీ
                 బుద్ధుడు విస్మయంతో నవ్వాడు
హస్తిన పట్టాభి రాముడు భారతిని
అణు జ్వాలల్లో ప్రాయోపవేశం చేయమంటే
మాత కోకకు కూతల్తో నిప్పంటిస్తూన్న 
తోకలేని కోతుల్ని చూసి
               బుద్ధుడు బాధతో  నవ్వాడు
వికృత విస్పోటపు రవాలు
సద్దు మనుగుతూంటే
ఆకలి కేకలూ ....పాలందని పాపల ఏడుపూ
తీవ్ర మవడం చూసి 
              బుద్ధుడు జాలిగా నవ్వాడు 
వందిమాగధుల వందన సమర్పణ పై 
విజయం సాధిస్తున్న 
శాంతి కపోతాల సామర్థ్యాన్ని చూసి 
           బుద్ధుడు మనసారా నవ్వాడు .

ఈ కవితను ప్రోఖ్రాన్ అణు పరీక్షలు జరిపినప్పుడు రాసాను .బుద్ధుడు నవ్వాడు అనేది ఆనాడు ఉపయోగించిన కోడ్ .